Kulan balaaran oo ay magaalada Muqdisho ku yeesheen Siyaasiyiin, Aqoonyahano, Culimaa’udiin, Haween, Dhalinyaro iyo qeybaha kala duwan ee qowmiyadda beesha Jareer-weyne ayaa waxay uga hadleen xaaladda dalka Soomaaliya, waxayna ka soo horjeesteen 4.5-ka iyo hadalada gefka ah ee ay dadka Soomaaliyeed caadeysteen ee ah Adaris iyo waxa la midka ah oo aan diinta Islaamka meelna uga jirin.

Kulanka ayaa waxaa ugu horeyn ka hadlay Ugaas Sheekh Xasan Axmed oo sheegay in qowmiyadda Jareerweyne ay ka soo horjeedo in la yiraahdo Adaris iyo waxaad tihiin nus ka yar beelaha kale, wuxuuna ku hanjabay Ugaasku in hadda ka dib aysan u dulqaadan doonin in xaqa ay Jareeweyne ku leedahay Soomaalida dhexdeeda la duudsiiyo, isla markaasna aysan u cuntami doonin inay ku qancaan wax ka yar waxa ay qaataan beelaha kale ee Soomaalida ah, isagoo intaasi ku daray in Soomaaliya ay tahay oo keliya Jareer iyo Jaleec.

“Beesha Jareerweyne hadda ka dib way midowday mana jiro wax khilaaf ah oo ka dhaxeeya, sidoo kale beesha caalamka, Qaramada Midoobay iyo dowladda KMG waxaan u sheegaynaa inaan ka soo horjeedno in nala yiraahdo waxaad tihiin nus ka yar beelaha kale ee Soomaaliyeed iyo Adari  iyadoo la ogyahay in Soomaali ay tahay Jareer iyo Jaleec oo keliya, maanta ka dib diidnay in nala liido oo hoos naloo dhigo, waxaa jira dad caadeystay inay duudsiiyaan qowmiyadda Jareerweyne wixii ay xaqa u laheyd taasina diidnay” ayuu yiri Ugaas Sheekh Xasan Axmed.

Sidoo waxaa kulanka ka hadlay Boqor Faarax Cabdi Guure oo ah Boqorka qowmiyadda  beesha Jareerweyne wuxuuna sheegay in hadda ka dib aysan u cuntami doonin in la yiraahdo nus ayaad tihiin, isla markaasna lagu soo riiro beelo kale oo aan Jareer aheyn oo iyaguna la leeyahay waa nus oo dadka lama sinna, mana dooneyno ayuu yiri boqorku inaan xaq dad kale leeyahay qaadano, sidaas oo kalena ma dooneyno in xaqeena dad kale la siiyo oo nala duudsiiyo.

“Beesha Jareerweyne hadda ka dib kuma qanci doonto inay wax ku qaadato wax aan ka aheyn Jareer iyo Jaleec, iyadoo la ogyahay in qowmiyadda beesha Jareerweyne ay degto 10-ka gobol ee Soomaaliya ugu kheyraadka badan ahna beesha keliya ee ugu badan Soomaaliya in la yiraahdo Adarris ayaad tihiin runtii uma dulqaadan doono waana ka dagaalami doonaa hadalkaasi gefka ah, Jareer waa dadkii ugu horeeyay ee gumeysiga la diriay, Soomaaliyana gaarsiiyey xornimadeeda, marka iyadoo ay sidaasi tahay nooma qalanto in nala yiraahdo nus ayaad tihiin iyo wax aan afka soo qaban karin” ayuu yiri Boqor Faarax Cabdi Guure oo intaasi ku daray inay ka soo horjeedaan dastuurka la doonayo in Soomaaliya ay yeelato, wuxuuna xusay inaysan jirin dad ka socda Jareerweyne oo shirka Odayaasha ee Muqdisho ka qeybgalaya.

Ugu dambeyntii waxaa kulanka ka hadlay Guddoomiyaha Guddiga nabadeynta beelaha Jareerweyne Sheekh Muqtaar Cabdi Rooble oo sheegay in dhib kasta oo ku dhaca beelaha Jareerweyne ay iyagu mas’uul ka yihiin, loona baahnaa in mar hore ay ka tashadaan aayahooda si ay wax ula qeybsadaan Soomaalida inteeda kale, wuxuuna intaasi ku daray in haddii ay yihiin Jareerweyne ay ka soo horjeedaan in loogu magacaabo Adaris iyo wax la mid ah, isagoo sidoo kalena sheegay inay ka soo horjeedaan  dastuurka cusub, kuna baaqay in wax laga qabto dadka danaha gaarka ah ka leh Soomaaliya ee hadba dhinac u rogaya.